🎬المشهد :

نهار داخلى ..من داخل احدى قاعات التدريب الكبرى …📽

انتهت المدربة “ت.ل.ش ” من الكورس بتاعها ….💁
وبعد انتهاء التدريب طلبت من المتدربين ( المشاركين ..الاسم العلمى الصحيح للمتدربين) انهم يملوا استمارات التقييم النهائى ….🖊📋
وياريت كمان لو يسجلوا كلمتين حلوين عن الكورس بتاعها …
وفعلا الناس الجميله بتملا الإستمارات وبتسجل المطلوب ….
وبيتم عمل حفلة الختام وتصفيق حاد فى نهاية البرنامج لمدربتنا بطلة القصه “ت.ل.ش”
وبالوجوه المبتسمه بينتهى اليوم التدريبى😊

وبترجع المدربة مع اخصائى التدريب الاستاذ “تحسين ” يراجعوا إستمارات التقييم …
بيلاقوها كلها ” ممتاز وهايل جدا ” وبيرجعوا تانى يشوفوا الفيديوهات الحلوة الى الناس سجلتها بيلاقوا كلام جميل جدا ..وشعر فى المدربة ….👀

فبيعمل الاستاذ تحسين التقرير النهائى وبيتقفل ملف الكورس ده …..

مشهد مكرر فى فيلم تدريبى قديم ابيض واسود بيتعاد كل يوم فى معظم قاعات التدريب بإختلاف انواع الكورسات ….🎞🎞

ايه ده ؟؟؟؟ انت قصدك ايه ؟؟؟ احنا مش فاهمين حاجه ؟؟؟
ببساطه …جدا …ومن غير زعل ….
ده كله بيقول انك عرف تتواصل وان حصل كيميا بينك وبين الحضور ..لكن ده مش دليل على ان التدريب كان ليه الأثر المطلوب ..✔✅
استاذ تحسين لما بيجى مديره يطلب منه التحسين والتطوير او حتى المدربة تطلب اى اراء للتحسن مش هيعرف ..مش هيعرف يعمل حاجه ..ليه ؟؟؟؟
لان مفيش حاجه فى التدريب عرف ياخدها او يقيميها او يلمسها غير انه لطيف وظريف واحنا استفدنا وقضينا وقت جميل مع المدربة ( ده اذا كان العامل ده كمان متوافر )…
لكن فعليا هل التدريب ده كان مفيد ؟؟؟؟
ايه درجة الاستفادة ؟؟؟؟
طيب ايه الهدف من التدريب ؟؟؟ هل الهدف اتحقق ؟؟؟ ولو متحققش ليه ؟؟؟؟
طيب هل التدريب فعلا أثر فى المشاركين ؟؟؟؟ اعرف منين الأثر واقيسه ازاى ؟؟؟
هل الناس دى ممكن تحضرلى تانى ؟؟؟
هل قدمت قيمه عظيمه ليهم ؟؟؟ اعرف منين ؟؟؟ وهل هما حسوا بالقيمه دى ؟؟

قالوا لنا زمان ان اى شئ غير قابل للقياس هو غير قابل للتطوير …
“Any thing that can not be Measured …can not be improved“

وده مبدأ من مبادئ جودة أى منتج او سلعه(مفيش فايده الجوده مأثره جدا عليه )

عشان كده اى حد بيقدم منتج او خدمه لازم يعرف انه اذا معرفش يقيسه مش يقيمه هيكون عنده مشكله انه فعليا مش هيعرف يطوره ولا يعرف فين المشاكل ويبدا يحلها ..

ليه بقول كده لان الحقيقه فى مجال التدريب بيحصل حاجه دائمة التكرار ايه هيه
” المجاملات او رد الفعل المجامل والى انا بسميها “خدعة التقييم “

خدعة ..ايوى خدعه Fake Feedback ….. هو feedback اه بس حقيقي Fake

ليه لانه ببساطه لا حصل تقييم ولا قياس لاى شئ …
فيه كمية تحيز ومجاملات كتيره جدا من المشاركين للمدرب او المدربه ….
ودائما المشاركين بيكونوا واقعين تحت تأثير المدرب …
يعنى ايه ؟؟؟
يعنى اى مدرب فى الدنيا ليه تأثير ولو ملوش تأثير مينفعش يبقى مدرب لانه لا هيعرف يكون مقنع ولا هيغير فى قناعات ولا اتجاهات وبالتالى مفيش اى مهارات هيتم اكتسابها …
يعنى الموضوع بالظبط كانك بتطلب من حد “يقولك كلمتين حلوين ” عشان يطيب بيهم خاطرك بعد التدريب …
لكن يا ترى ده المعيار ؟؟؟؟ ياترى كده فعلا التدريب حقق النتائج المطلوبة منه ؟؟؟؟
أكيد لا…ده مش المعيار ….

عشان كده المدربه “ت.ل.ش” كانت دايما مش عارفه تعمل ايه عشان تطور من أدائها ولا تجدد من الى بتقدمه للناس ..وكمان كتير من المشاركين والشركات الى كانوا بيتعاملوا معاها هيه والاستاذ تحسين كانوا بيشتكوا ان التدريب كان جميل …بس فيه فرق بين التدريب ( النظرى ) والواقع العملى فى شغلهم والحياه …..
او بيقولوا استفدنا جدا من الكورس بس مقدرناش نغير حاجه …..

او تيجى لصاحب الشركه تلاقيه بيشتكى انه بيرمى فلوسه على الارض وان التدريب ملوش اى تأثير … والكلمه الاشهر “ميزانيه مهدره ” ….
مع ان التدريب ده هو اهم اداه لتطوير الاداء والسلوكيات ….

طيب عشان منطولش عليكم التقييم والقياس الحقيقى للتدريب بيكون بقياس هل هدف التدريب اتحقق ولا لأ ؟؟؟
لازم هدف التدريب يكون محدد من الاول ….
هل الهدف من التدريب انه يعالج مشكلة ؟؟؟؟
ولا يطور أداء ؟؟؟ ولا فيه قصور فى الاداء بيعالجه ولا إيه بالظبط ؟؟؟
وكل ما كان الهدف محدد اكتر ومحدد ليه معايير قياس كل ما عرفنا نقيس مدى جودة التدريب وأثره وعرفنا كمان نطوره بسهولة وموضوعيه ….

التدريب من المهن الى ربنا جعلها وسيله تنور طرق جديده فى حياه الناس …تاخد بإيديهم وتحسن عقلياتهم وسلوكياتهم وأدائهم …فمتتخدعش بالكلام الحلو ولا خدعه التدريب …

قيس /قيسى نجاحك بعد التدريب بشهور ..لما تلاقى المشاركين الى عندك فعلا اتغير تفكيرهم …شكل ادائهم فى شغلهم اتغير ..المشكله الى كانوا جايين بيها قبل التدريب خلاص عارفين يتعاملوا معاها …المشكله الى كانت فى حياتهم عرفوا يتحكموا فيها وحياتهم بقت احسن ….
اكتر حاجه بتحسس المدرب بالأثر انه بعد شهور او سنين حد من المشاركين الى حضروا معاه يكون فاكر التدريب وتفاصيله ويكون كمان طبق حاجات كتير منه …ويجى يخليك تشارك معاه نتائج تطور أدائه على الارض ….
وده هو الأثر الحقيقي ..وده هو الFeedback الى بجد الى انت عاوزه ومحتاجه
عشان تكون مؤثر اكتر …ويكون التدريب اثر اكثر فاعليه …..

دمتم أصحاب أثر جميعا ….ودام التدريب رسالة وقيمة …..
#The_Unique_Trainer
#TOT. #Creativity #Uniquness
#Courses. #Speaking_Out_loud
#Master_your_training_powers