بداية الحدوته ….
ببساطه من وانا صغيره كنت بحب التميز جدا …
وكنت بشوف الناس المتميزه فى اى مجال كأنهم نجوم عاليه فى السما …
وكنت متبرمجه زى كتير مننا للأسف …ان التميز = تفوق …
فطول عمرى كنت بجرى جرى فظيع وبجتهد جدا عشان اتفوق ….

ولما كبرت شوية فى مرحلة الاعداى ..كان والدى بدأ مشروعه بأنه فتح مركز تدريب وكان بياخدنى معاه …اشتغل واساعد واحضر معاه ومع مدربين تانين … كنت بشتغل زى ” بليه بتاع التدريب” ….

اعمل مواد علميه ..اوزع بطاقات تعارف وتقييم …اتكلم مع الناس فى الBreak واعمل Socializing ..وكده .

والحقيقه دى كانت فرصه عظيمه ليه شكلت فيه كتير…كنت بشوف تأثير المدرب المؤثر والمتميز على المشاركين … وفى نفس الوقت التأثير الضعيف والممل احيانا للمدرب الى بيقلب التدريب لمحاضره …
وطبعا كنت بنبهر جدا بتأثير المدرب المتميز…مهاراته وطريقة الكلام والالقاء ….كل التفاصيل دى كانت بتشدنى جدا ….

لحد ما دخلت الجامعه وكالعادة ..دخلت واحده من كليات القمه ورغم انها كانت من اهدافى الى سعيت لها كتير   إلا انى لما دخلتها حسيت من اول يوم انى فى طريق مش طريقى …ومع كده كملت ..لحد ما اتخرجت …..بس كنت واخده قرار انى مش هكمل ومش هيكون مستقبلى فى المجال ده ..وانى محتاجه ابدأ ادور على نفسى ادور على الحاجه الى ممكن اشتغلها وتكون مؤثره واحبها واستمتع بيها ….
والحقيقه ان طريق التوهان خدنى كتير جدا …كنت باخد كورسات كتير وبخلص كورسات كتير ….واخدت الماجستير فى سنه 2008 …بعد 3 سنين بالظبط من التخرج ..( كنت دحاحه والله جدا ) 
لحد ما يومها يوم المناقشة قررت انى هقف شويه بقه …

تعبت من الفرهده …وعاوزه بقى اشتغل فى مجال اكبر فيه و ابدا ادرب …وعلى قد ما التدريب كان دايما قدامى إلا انه كان ابعد ما يكون عن خيالى انى اشتغل فى التدريب ….
كمهندسه اولا ..وثانيا عشت فى دور لن أعيش فى جلباب ابى شوية حلوين ….

وكنت بحاول ادور كتير عن فرصه
ولسه فاكره اول انترفيو ليه فى شركه وهو بيسالنى :” ايه كل الكورسات دى ؟؟؟
وايه علاقة كل الكورسات دى ببعض ؟؟؟؟
مفيش تخصص محدد ليه ؟؟”
الكلام ده كان صعب جدا .. وجعنى اوى …لانه حقيقى كان بيعبر عن حالة التوهان الى كنت فيها …

لحد ما خلصت الماجستير وبدأت اخطط لنزولى التدريب …وقتها والدى رفض انى انزل التدريب معاه فى المركز … لانى من وجهة نظره مكنتش لسه جاهزه ..ولانى لسه مش معايا دكتوراه …وهو مش بيشغل معاه اقل من دكتوراه …
وقتها قررت انى ابدأ اخوض التجربه واشتغلت مدربه فى شركات كتير ومراكز تدريب كتير ….
كنت بواجه اكبر مشكله قدامى …انى لسه صغيره 25 سنه ..بنزل فى اماكن فيها خبرات وفطاحل التدريب … وكتير بتقارن بيهم ومعظمهم يعرفنى من المجال عشان والدى ..وكان لازم اثبت نفسى …بس الحقيقه كنت بفكر ازاى اقدر يكون لي تواجد – مش انافس حتي وسط العمالقه والعظماء دول ….