حضرت كورسات كتير جدا كان دايما المدرب بيبدا فيهم باخطاء كتير بتؤثر على الناس وعلى التفاعل معاهم  وبدل ما يبينى ما بينه وبينهم قنوات تزود  التواصل والتفاعل وتدوب الثلج … بيبنى حواجز اكثر وبتكون البدايات الغلط مشكله كبيره بتخلى الناس تحط فروض مش صح ابدا فيه .

طيب يا ترى ايه هيه اهم 6 اخطاء بيقع فيهم المدرب ؟

• ان فى بداية البرنامج المدرب يتأخر على المتدربين .

وده لما بيحصل الحقيقه بيدى رساله عدم اهتمام للناس وبيحسسهم ان المدرب مش محترم وجودهم وانه شايف نفسه اهم منهم فهما الى لازم ينتظروه ..وده طبعا بيبنى عندهم فكره سيئه عن المدرب هو الحقيقه فى غنى عنها .

• وثانى غلطة ان اول ما المدرب بيجى بيدخل يحط حاجاته وميحاولش يتواصل حتى بلغة الجسد مع الناس وبعد لما يخلص يبدأ علطول ينتقل لمرحلة التعارف .

ودى مشكله تانيه اننا بنبدأ ندرك لغة الجسد من ساعة ما عنينا بتقع على المدرب و بنحب نحس انه انسان بشوش منفتح وتلقائى ..وده طبعا عكس بعض الناس الى بتدخل حاطه 111 على وشها عشان الهيبه وعشان الناس تحس انها جد اكتر وتحترمها وده طبعا مشكله لانه بيبنى حواجز اكتر واكتر .

• الغلطة الاكبر والاعظم فى مرحلة التعارف ان المدرب يبدأ يعرف نفسه ويبدا يحكى قصته كامله من غير ما يتعرف على المشاركين ..وياخد وقت طويل فى انه يحكى تفاصيل كتير عن خبراته وحياته …

انا مره حضرت كورس وكان فيه مدرب جامد جدا من الناس المشهوره جدا فى عالم التدريب وفوجئت انه كان عامل powerpoint  presentation عن نفسه وقعد اول جزء من اول يوم ساعتين كاملين يعرض الpresentation الى عن نفسه دى …طبعا انا كنت خلاص بنهار من الملل كل الناس كانت قاعده بتقاوم النوم او الملل …كان نفسى اقوله طيب انت بتحكى ليه كل ده …طيب ما تسيبنا احنا نشوف ونقيم ونعيش …

طبعا الاحسن انه يبدأ بتعريف بسيط جدا عن نفسه ..اسمه والوظيفه او التخصص فى مجال التدريب وبعدين يبدأ مرحلة التعارف بالمشاركين …لان الحقيقه احنا بكده بنطيق واحده من اهم قواعد علم النفس وهى :” ان الإنسان يميل إلى من يستمع إليه “

يعنى الانسان بطبيعته بيميل وبيرتاح للشخص الى بيسمعله والى بيتعاطف معاه ..وده بيساعد جدا على ذوبان الحدود الى بين المدرب والمشاركين فى الكورس وبيحسسهم انك مهتم تعرف اكتر عنهم وانك متعاطف معاهم وكمان ده بيكون فرصه كبيره انك تعرف اكتر عن كل مشارك فتعرف ازاى تتعامل معاه بافضل طريقه .

• الغلطة الرابعه هى انك تبدا فى محتوى الكورس علطول من غير ما تعمل Icebreaker …

والحقيقه انه مش موضه فى التديب ولا حاجه ده ليه فايده كبيره جدا …وهى ذوبان الثلج بينك وبين المشاركين …

يعنى ايه ؟؟

يعنى انت كمدرب بيكون معاك ناس فى التدريب لسه معرفتهمش كويس …وهما كمان ما بينهم ميعرفوش بعض كويس ..فبتكون محتاج تحسسهم بالراحه ووتدرب الحواجز ى عشان يبدأوا ياخدوا عليك ويثقوا فيك ..ويبداو كمان يتعاملوا مع بعض ويحصل جو من الألفه ما بينهم .

• الغلطه الخامسه ..انك تبدا تعرض البرنامج بالاجنده بتاعته من غير ما تسأل المشاركين عن توقعاتهم فى الكورس ..

يا ترى تتوقعوا تتعلموا ايه فى الكورس …

ايه المهارات الى انتوا شايفين انكم عاوزين تكتسبوها ؟

وابدأ اجمع التوقعات …

اهمية الخطوه دى هى معرفه كل شخص عاوز ايه من الكورس ده ايه احتياجه والى المفروض انا كمدرب اشتغل عليه واستوفيه عشان الشخص فعلا يقدر يكتسب المهاره ويطور أدائه ..طيب يعنى بغير فى اجنده الكورس ..ايوى احيانا بضيف حاجات وبركز على حاجات تانيه طبقا لتوقعات الناس الى معايا وده احترام لتفردهم …ولو فيه توقعات بعيده تماما عن خطة او موضوع البرناج بقول انها بعيده تماما وبنصح ازاى يقدروا يقرأوا او يطوروا نفسهم فيها .

• الغلطة السادسه وطبعا مش الاخيره ..بس هيه غلطه شهيره جدا ان المدرب يحضر كويس قوى ويكون متهيأله انه اهم حاجه داخل الكورس يعملها هى انه يدى معلومات ومعارف Knowledge فبالتالى تلاقيه مركز جدا فى انه يقول كل المعلومات وتلاقيه دايما واقف جنب الppt او جنب سبوره الشرح او الفيليب شارت …الحقيقه ده بيحصل لانه بيدخل حاسس انه اهم حاجه المعلومات …وده بيدى انطباع للمشاركين ان العرض التقديمى هو مصدر قوتك …والحقيقه ان انت الى محضر الppt ودى ادواتك ..انت الى عاملها مش هيه الى عملتك …

عشان كده دايما لازم المدرب يركز على كيفيه اكساب المهارات ” احنا مش شغلتنا مش  المعلومات ..احنا شغلتنا المهارات “

المعلومات دى وتبسيط المعلومه ..اسهل حاجه بالنسبه للمدرب

والمعلومات هنلاقيها فى الكتب وممكن نلاقيها فى كل حته ..لكن الناس بتتحرك وبتاخد قرار انها تروح تاخد كورس عشان عايزين المهارات .

ودى كانت اهم 6 أخطاء الى بيقع فيهم المدربين فى بداية البرنامج …يفضل ان المدرب المتميز ياخد باله منهم عشان ميقعش فيهم .

فخد بالك :

• التزم ومتتأخرش على الناس وخلى مواعيد مظبوطه
• اول ما تدخل القاعه تواصل مع الناس بالعين وخلى وشك بشوش ومبتسم لان ده بيساعد على نشر الالفه بينك وبين الناس .
• عرف نفسك ببساطه واتعرف على الناس القول قبل ما تحكى حكايتك ..عشان الناس متملش وتزهق .وعشان الانسان بيميل الى من يستمع اليه .
• ابدا بذوبان الثلج وخليه حاجه ممتعه ومبهره .
• اسال “ماذا تتوقع من البرنامج ” عشان تضمن ان الWhy

او توقعات الناس كلها معاك وتقدر تعرف تركز على ايه وتغير ايه…لان التدريب فيه مرونه.

• اشتغل على المهارات وحاول انك تتحرك فى التدريب وتتجنب انك تقف دايما جنب العرض التقديمى او السبوره .