مدربين كتير بيفتكروا انهم عشان مبيحبوش القراءه …فهما كده مدربين فاشلين …..
ودايما بيسألوا ازاى هنعرف نتطور ونتقدم ونبقى Updated من غير ما نكون بنقرأ …📖

طيب ياترى لو انا عايزه ابدا خطواتى فى مجال التدريب المفروض أبدا منين وانا مبحبش القراءه ؟

✍️✍️لو عايز تعرف / او عاوزه تعرفى ازاى تبدا اول خطوة فى مجال التدريب….

👀👀” لازم تتعلموا إزاى بتتعلموا ؟؟؟؟؟ ” 

ايه الكلام ده يعنى ايه ؟؟؟
يعنى عشان تكون مدرب ناجح لازم تبقى Long Life Learner يعنى تكون بتحاول ودايما بتسعى ورا التعلم والنمو والتطور طول حياتك .

طيب ده هيتم إزاى وانت اساسا متعرفش انت بتتعلم إزاى ؟؟؟؟
وحاطين فى دماغنا اننا عشان مش بنحب القراءه فمش هينفع نتطور ….

يعنى مثلا كان عندى واحده صاحبتى نفسها (تبقى مدربة ) و مدمنة كورسات …ماشاء الله عليها …
كل ما تلاقى كورس تجرى عليه ….
أسالها بتاخدى الكورس ده ليه ؟؟؟؟
تقولى اصلى “مش عارفه حاجه عن الموضوع ده وصراحه انا مبحبش أقرأ “….
فرديت عليها :” هو لما تعوزى تعرفى حاجه ..تروحى كورس ؟ “
تقولى :”اه “
طيب :” جربتى تحطى نفسك فى مووود القراءه ؟؟؟؟
لقيتها بتساالنى :” مووود القراءه ؟“
رديت :” ايوى ..انك تخصصى وقت للقراءه وفى مكان معين جميل ومريح وتكونى حاطه فيه الكتاب او الكتب بتاعتك بطريقه حلوة …وتسمعى ميوزك كمان لو تحبى ..🎵🎶
يعنى تهيئى المكان كويس .”
وطبعا اكيد تختارى كتاب انت حابه موضوعه من الاساس ….
يعنى مخترش حاجه انا مبحبهاش اساسا واقول او اجبر نفسى على انى اقعد اقرا فيها …
ردت : ” هجرب “
بعد اسبوع كده رجعتلى تقولى :” على فكره كل الى انت قلتليلى عليه ده عملته ومفيش فايده ..عملت ركنه جميله وجو فظيع واشتريت كتاب جميل جدا وممتع و Best seller كمان …وقعدت بقه احفز نفسى عشان اقرأه ….مفيش صفحتين وزهقت وبدات افرك وقمت ..ومكنتش عاوزه امسكه تانى “

” مش قلت لك انا مليش فى التعلم والقراءه والحاجات دى ” …..

أنا: ” فعلا طيب يبقى كده المشكله فى ببساطه مش فى انك مش بتتعلمى ..انت اسلوب او وسيلة التعلم عندك هيه الى فيها مشكله …
يعنى انت ممكن تكون بتتعلمى كويس جدا واسرع كمان من الناس الى بتحب القراءه. بس بطريقة مختلفة .”

هى : “هو فيه حاجه تساعد الواحد انه يتعلم ويتطور غير القراءه “
انا : ” ايوى طبعا ممكن بدليل انك بتروحى كورسات وبتتعلمى فى الكورسات وتستفيدى”…مسألتيش نفسك اشمعنى الكورسات ؟؟؟ “
هى : ” سالت نفسى والله كتير وكانت دائما الاسباب الى بتيجى فى بالى الجو بتاع الكورس ..الناس ..يمكن المدرب وتأثيره ..مبنمش ومبزهقش ..يمكن عشان بفكر واشارك واتكلم ونتناقش فى حاجات كتير ” …

رديت بسرعه : ايوى هيه دى ….☝️☝️
فرملى بقه كده ” بتكلم واتناقش ….يبقى ده اسلوب او نمط التعلم المناسب ليكى ..الى عقلك بيعرف يتعامل بيه ويتعلم ويتفاعل بيه بسرعه …وده اسمه النمط السمعى Auditory Learner

اتبسطت جدا ولفت لى :” ايه ده عرفتى منين ؟؟؟ “
قلت لها كنت قرأت عن انماط التعلم وكل نمط ايه اهم الاساليب والادوات الى بيتعلم بيها احسن واسرع ….
وازاى نعرفهم وكمان عملت اختبار حلو اون لاين يقدر يعرفك ازاى تعرفى انت انهى نوع او نمط من الLearners >>>>

🧠اول نوع: النمط السمعى Auditory Learners
_________________________________
ودول الانماط الى بتحب تسمع وتتكلم اكتر من ما تقرأ ….
They have big mouth and Big ears …..
الناس دى بتتعلم بالمناقشه …بتسمع كويس وتتناقش ..ولما بتتناقش وتقتنع عمرهم ما بينسوا المعلومه الى اتناقشوا فيها …
بتجذبهم الاصوات المختلفة وتأثيراتها …
,بيعرفوا يفهموا الى قدامهم ببساطه من نبرة صوته ….
بيفتكروا المعلومه من نغمه الصوت الى سمعوها بيها او نبره صوت الى قالها …

دول اصحابنا وحبايبنا الى بيحبوا الكورسات جدا ويعتبروا من افضل انواع المشاركين لانهم بيتفاعلوا جدا …بيسمعوا كويس جدا وركزوا طالما المدرب صوته واضح وفيه اختلاف فى نبرات صوته مش Mono tone …عشان كده لما بيروحوا كورس ويلاقوا الى واقف قلب الكورس محاضره …بيكونوا اول الهاربين او اول ناس بتنام 😂😂

واهم وسائل التعلم الى بتساعدهم جدا هيه الPodcasts …. وده الى انا نصحت صاحبتى بيه …قلت لها عاوزه تتعلمى بسرعه وتستمتعى وتتطورى ” اسمعى كتير “
ممكن تسمعى فى كورس طبعا …
وممكن تسمعى Podcasts … وعشان هيه بتحب كورسات التنمية والبيزنس جدا
قلت لها على اشهر البودكاست فى المجالات دى ( هتلاقوها فى اول كومنت )

ومن الوسائل الجميله جدا ليهم الكتب المقرؤه …
وفيه ابليكيشن حلو جدا على الموبايل لقراءه الكتب والروايات أسمه ” أقرألى “
وطبعا فيه الكتب المقرؤه على امازون وجوجل Audio books

🎬وممكن كمان النوع ده من المتعلمين يتعلم من خلال الفيديوهات او الكورسات الاون لاين
Videos and online learning بس بشرط يكون طبعا الى بيتكلم فى الفيديو او الكورس صوته فيه كل عوامل الجذب ….

وفعلا صاحبتى دى عملت الاختبار وطلعت اعلى نسبه عندها فى طرق التعلم هيه النمط السمعى وبدات فعلا تستسخدم الادوات دى ….وصراحه نفسها اتفتحت جدا على التعلم والعلم ….

كل واحد فينا ممكن يتعلم ويتطور ويشكل مستقبله …بس بالطريقة الى تناسبه ….🧠
مش كلنا بنتعلم زى بعض …وده مش معناه اننك عشان مش بتحب تقرأ انك انسان غير قابل للتعلم …لأ انت بتتعلم بس بالطريقة الى تناسبك ….

👨‍🎓وعشان تبقى مدرب حقيقى ..لازم تعرف تتعلم كتير وتسعى للمعلومات وللمعارف وللتطبيقات الجديده مع كل نفس بتتنفسه ….ويكون التعلم ده عادة من عاداتك وشغف كبير بيشحن عقلك طاقه ويغذيه ….

“المدرب المتميز الصبح بيدرب …وبالليل بيتدرب “
يعنى ممكن الصبح تكون واقف فى كورس انت المدرب الى بتعلم معارف وبتكسب مهارات …وبالليل فى مكان تانى انت المتدريب الى بتتعلم وبتكتسب مهارات جديده
لانك ببساطه التعلم بالنسبه لك طريق ورساله ….

وده اختبار بيبين انواع وانماط التعلم : 👂👀👣
http://www.educationplanner.org/students/self-assessments/learning-styles-quiz.shtml

ودى افضل الPodcasts فى مجال ال Developmenet
1-http://www.businessinsider.com/podcasts-change-how-you-understand-human-behavior-2017-1#happier-with-gretchen-rubin-2
2-https://tonyrobbins.libsyn.com/
3-https://www.robinsharma.com/podcast/

✍️ياترى انتوا نمطكم ايه ؟؟؟ وايه افضل طريقة بتتعلموا بيها ؟

#مدرب_مش_فاشل
#تدريب_مختلف
#Trainers_Long_life_learners
#L