كورس ميتنسيش
يعنى ايه كورس مؤثر ؟؟؟
يعنى كورس فعلا بيغير ..كورس فعلا قادر انه يعيد تشكيل مفاهيم وعقليات …يحل مشاكل …يكسب مهارات …يغير اتجاهات يفتح فرص وافاق جديده ….
طيب يا ترى هل كل الكورسات الى بنحضرها او بنشوفها بتعمل كده ؟؟؟؟
اكيد لأ ؟؟؟ طيب يا ترى فين المشكله .؟؟؟؟
الحقيقة مشاكل التدريب كتير ويمكن كنا بدانا نتكلم مع بعض فيها فى البوست الى فات عن الكورسات الى ملهاش لازمه…
لكن من اهم مشاكل التدريب حقيقة ان المدرب بيتعامل مع المتدربين زى الاطفال بالظبط …..
ايه ده ؟؟؟؟ إزاى يعنى ؟؟؟؟؟
قصدى انه بيتعامل ان الناس الى بتحضر له جاهزه تماما وعقلها فاضى انها تخرن فيه كم المعلومات الكبير الى هوه بيديه فى وقت صغير قوى …..
فالحقيقه ان احنا ككبار فى طرق التعلم بتاعتنا بنختلف عن الاطفال تماما ….
الاطفال عقلهم بيكون مفيهوش الزحمه الى فى عقولنا فبيقدروا ياخدوا قدر كبير جدا من المعلومات ….وبيتعلموا اسرع …لان ال Hardware بتاعهم فاضى مش زينا …
اما الكبار ال Hardware بتاعهم بيكون دايما مليان …
مليان بخبرات قديمة كتير وتجارب واحلام للمستقبل وتوقعات للحاضر …ومشاكل وتفاصيل …فبالتالى مش اى حاجه ولا اى معلومه تقدر ببساطه تدخل دماغهم وتثبت فيها …لأ ومش بس كده كمان مطلوب منهم يطبقوا المعلومه دى فى حياتهم ويكتسبوا المهارات المتعلقه بيها عشان يعرفوا ينفذوها …..
وعلى الرغم من ان الكبار مش بيتعلموا زى الاطفال …إلا ان جوه كل واحد مننا الطفل المنطلق ….الى بيتعلم عن طريق إستكشاف العالم
الطفل الى بيتعلم وهو منطلق …
وهو حر …وهو بيضحك … وهو بيلعب …وهو بيجرب حاجات جديده ….
الطفل الى بيتحمس جدا فى جو المنافسه ……
الطفل الى كل ما حياته كان فيها الوان اكتر …كل ما حس بسعادة اكبر ….
وكل ما اتحرك اكتر يبدع اكتر واكتر …..
ببساطه الطفل ده جوه كل واحد فينا …وانجح المدربين هما الى بيعرفوا يحركوا الطفل الى جوه كل واحد فينا ….
هما الى بيعرفوا يطلقوا طاقات الطفل ده …الطاقات البسيطة جدا …لكن عظيمه جدا ومؤثره جدا جدا …..
The great trainer is the trainer who can Unleash the Child within you
ومهما كان سن او منصب او وظيفة المتدرب او المتدربة الى بيحضروا الكورس هتلاقيهم وقت الالعاب التدريبية وورش العمل منطلقين …سعداء …بيستمتعوا جدا بوقتهم ….وكل لحظة بتمر عليهم محفوره فى ذاكرتهم وقلوبهم رغم الزحمه الى عقولهم ….
وبالمناسبه عاوزه احكى لكم عن مجموعه كنت بديهم كورس إدارة التغيير فى 2010 …يعنى من 10 سنين تقريبا والحقيقه انا الكورس ده بقدمه كتير جدا ومن زمان لانه يعتبر اساس Foundation
لكتير من الكورسات الى اساسها بيكون الاول اننا نتعلم ازاى نتغير ….
ولانه علم كبير ودى كانت ورشه فى ادارة التغيير يوم واحد بس …قررت انى اخلى الناس يحبوا التغيير ويتحمسوا ليه جدا من خلال تبسيط معلومات إدارة التغيير لابعد ما يكون …
وقتها كان لسه كتاب براين تراسيى Brian Tracy
Who moved my cheese? لسه نازل السوق ….
فكرت انى اخليهم يتعلموا مبادئ إدارة التغيير من خلال ال14 مبدأ الى كتبهم براين تراسى فى الكتاب وببساطه قررت انى احول القصه فى الكتااب الى تحدى حقيقى على ارض الواقع ….
وفعلا روحت اشتريت ورق مقوى وخشب رفيع وعملت ماكيت لقطعه جبنه كبيره جدا …والماكيت ده كان مفرغ من الداخل ..وبعدين حطيت جواه هدية ….
وبعدين قمت بطباعه نفس شكل قطع الجبنه على كروت …وعلى الناحيه التانيه من كل كارت فيه واحده من مبادئ إدارة التغيير وسؤال ..محتاج نجاوب عليه عشان نعرف نطبق المبدأ ده …
اخدت ال14 كارت وخبيت كل كارت منهم فى مكان …..
واول ما بدات اليوم التدريبى …دخلت بماكيت الجبنه الكبير …الى كان جاذب اهتمام الناس كلها …عاوزين يعرفوا ايه الجبنه دى ..وهنعمل بيها ايه وياترى ايه علاقتها بإدارة التغيير ؟؟؟؟
وبدانا اليوم …واشتغلت شوية وبعدين بدات اقسم الناس مجموعتين …المجموعه الى هتكسب فى زمن دقيقتين هى الى هتعرف تلاقى اكبر عدد من الكروت ….
وتجاوب كمان على الاسئله الى فيهم …..
وبدات المسابقه …وبدأت اللحظات الجميلة ..وبدأت الضحكات ..وبدا معاها حماس الناس …وكل ما حد يلاقى كارت يفرح ويجرى بحماس يفكر مع مجموعته على إجابه السؤال الى فيه ….
ولما خلصنا …طلع الفريق الى كسبان …يقدم المبادئ كل واحد …يشرح المبدأ ويجاوب على السؤال ويقول رأيه فى اللعبه الى لعبها …
وبعد لما خلصوا وحكينا حكاية الكتاب “من الذى زحزح جبنتى” …
كل واحد منهم قال هو شايف نفسه مين من اصحاب القصه القزمين Hem و Haw
ولا الفأرين Sniff و Scary …..
وليه هو شايف نفسه الشخصيه دى ومطلوب منه يغير ايه فى نفسه عشان يكون افضل ؟؟؟
طبعا كان يوم ممتع وجميل …للمشاركين وليه انا نفسى ….
وبعد اليوم ده قدروا فى اخر اليوم يعملوا ملخص لكل قواعد إدارة التغيير وإزاى يطبقوها ويستفديوا منها فى حياتهم وشغلهم ….وكمان ليه كل واحد بيقاوم التغيير وإزاى يقدر يتغلب على الموضوع ده …..
وبعد سنين قابلت اتنين منهم فى مكان تانى واحد منهم كان رئيس مجلس إدارة شركة وواحدة كانت مديرة مدرسة … الاتنين بعد الترحاب والسلام قعدوا يحكوولى على الكورس ده وإزاى كانوا مبسوطين جدا فيه وانه بعد مرور 5 او 6 سنوات لسه فاكرين الى حصل فيه …لسه فاكرين مبادئ إدارة التغيير ال14 ولسه فاكرين ازاى يتغلبوا عليها والسؤال الى طلع لكل واحد منهم ….
والاجمل والاروع الحقيقه الى قاله أستاذى الفاضل ..قال :” فى لحظة اتحولنا لأطفال ..حولتى كل واحد فينا لطفل بيجرى وبيتسابق وبينزل على رجله يدور تحت الترابيزات وبيضحك وينط ….وكمان فى الاخر كل واحد فينا شاف نفسه فى شخصيات القصه مين ..حولتينا لأقزام وفئران ….” 😀
وببساطه هو لخص ايه الى حصل وفى نفس الوقت اهم العوامل الى تخلى الكورس فعلا مؤثر وتخلى المتدربين الى معاك يفتكروا الكورس ومينسوهوش ابدا ويكتسبوا المهارات الى تخليهم يطبقوه فورا فى حياتهم ..
والعوامل دى هى :
- الكوورس يكون فيه مشاركه عاليه .
- الحدوته والقصه هى اسهل الطرق لإكساب المعلومه تماما زى حواديت الاطفال …بتطلق الخيال وبتخزن المعلومه بطريقة صحيحه .
- الحركة ..كل ما قدر المدرب انه يصمم انشطه وادوات تدريبية تخلى المشاركين يتحركوا اكتر او يستخدموا حواس اكتر كل ما كانت نسبه التذكر وان الناس تفتكر اكتر واكتر …احنا الكبار بنفتكر الحاجات الى بنعيشها …
- جو التدريب كل ما كان فيه مرح وحرية …كل ما كان افضل للتعلم التطبيق .
- المجسمات والعامل البصرى هام جدا فى جذب العقل البشرى وتحفيزه على التعلم والتذكر …( الماكيت ..كروت الجبنه …الفيلم )
- المسابقات والهدايا بتحرك اصعب المشاركين وبتخلى اهداف البرنامج واضحه وبتشحن طاقة المشاركين على تحقيق هدف البرنامج .